擇 (已結業)

觀塘駱駝漆3座一直係小店集中地，其中11樓算係集中地之中嘅集中地！今日上11樓搵食，見到有新嘢！餐牌一睇都幾好，好健康同唔係好健康都有🤣，餐廳環境都好好，用左好多木原素，全店簡約路線，MUJI風到連音樂都好MUJI😀一個人想自閉食又得，三四個人座餐枱亦得！入去坐底主菜揀左蜜汁豬頸肉，前菜揀左糖心蛋同泡菜，主食係秋田米白飯，餐點黎到，見到個白飯好靚仔，作為主食，好多餐廳都唔專重呢個白飯，但呢間舖嘅白飯真係好好食，粒粒分明，適當嘅𥺦性令你好易夾，飯香都好夠，令我都食左三四口先開始食其他嘢，蜜汁豬頸肉嘅汁甜甜地唔過份，肉汁個有少少爽口，係好嘅豬頸肉口感，泡菜係好食嘅泡菜，老細應該有揀過下，不境難食嘅泡菜係市面都唔少，之後再食糖心蛋，好好食，蛋黃好流心，浸蛋嘅汁少少清甜，好夾！埋單73蚊，本人覺得好合理，食物味道同店舖裝修對得住個價有餘，同大廈貴過佢嘅大把但好食過嘅唔多!!一定再黎!!