極尚大瀛喜日本料理 (已結業)

同朋友係銅鑼灣行街，街上面有人派傳單，睇到呢間日式放題好似唔錯，價錢都ok，就諗住黎試下。上到去見到呢間放題真係好多人食，等位嘅人排到成條走廊都係，我地都等左一陣先有位。呢間放題嘅刺身有三文魚、劍魚腩、希靈魚、北極貝、甜蝦、赤蝦、帶子等等，三文魚嘅紋理清晰，睇得出好新鮮，其他刺身亦都好食，北極貝、甜蝦都非常鮮甜。呢度仲有海膽手卷，海膽如果唔新鮮會好腥，不過呢度海膽唔會，幾好食。其他熟食都幾多選擇，因為朋友唔太食生野，所以叫左好多熟食。芝士焗帶子好香，雖然係芝士焗，不過唔會覺得膩。烤羊架，肉質鮮嫩，保留到肉汁，唔會乾身又冇蘇味，幾好食。椒鹽蝦好惹味，燒甜薯好香甜，燒波蘿係我必點食物，好甜好多汁。仲叫左蟹皇粥，落左蟹一齊煲嘅粥味道非常鮮甜，粥好香好綿，又暖胃。食到咁飽，當然要食番杯乳酪雪糕幫助下消化，呢間放題自家制乳酪雪糕幾好食，可以加配料好似朱古力粒粒咁係上面，我食左兩大杯。呢間放題質數唔錯，下次可以約大班朋友黎食。