神輿日本料理 (已結業)

適逢生日，poohpooh帶左我去食放題！平時放題多數以量取勝，估唔到神輿呢間食物質素幾好！一出閘見到嘅係神社一般嘅裝飾，一旁嘅牆壁仲比客人自由掛上寫上願望嘅木牌，幾得意！座位比一般放題餐廳闊落，仲有卡位，所以坐得好舒服。餐廳提供嘅食物種類好多，有小食、主食、刺身、壽司、卷物、炸物、天婦羅、鍋物、爐端燒、甜品同埋飲品等等，應有盡有！以下都係我叫左覺得好食嘅食物。刺身係其中一樣可以一點再點嘅類別，比起一般放題新鮮肥美，而且種類多。其中帶子尤其出色，厚切而且鮮甜。呢碟炒雜菇望落平平無奇，但係原來好好食！牛油味香而且菇嘅種類多。我唔係特別好壽司但係呢間放題D卷物真係唔錯，好足料，口味幾特別，例如芝鰻卷、龍蝦和牛卷同埋黃金蟹卷。稻庭冷烏冬一向係my favourite！好彈牙好有好有嚼勁。芝士燒虎蝦賣相本身已經好吸引，點知味道都唔錯，燒得好香而且醬汁惹味。最吸引嘅地方係開邊燒所以唔係自己剝落。平時放題好少有熱飲，呢度有養生嘅玫瑰花茶揀，正！