Lagom Kaffe (已結業)

呢日適逢聖誕假期，去開觀塘海濱公園行下，夜晚到咗呢間位於海濱大廈嘅西餐廳。環境裝修走木系風，地方好大，仲有戶外座位，好chill好好feel。餐廳有二人、四人及六人餐之餘，亦有單點菜式。見聖誕假期，點咗個二人聖誕大餐應吓節。餐單十分豐富，油塘前菜主菜同埋餐飲，都只係$500左右，超抵食。 忌廉南瓜濃湯 - 南瓜味好香，質地creamy，口感幼滑。煎北海道帶子配蘆筍羅勒蕃茄汁 - 帶子大大隻，配埋蘆筍同埋蕃茄汁，味道好夾好開胃。 經典凱撒沙律 - 份量好大，田園沙律配埋粟米同埋哈密瓜，味道好清新，感覺相當健康。 港式香辣軟殼蟹意粉 - 賣相非常吸引，意粉整得好煙韌，軟殼蟹份量亦多，炸得香脆，入口好正。 法式紅酒牛面肉燉飯 - 牛面肉極之鮮嫩，煮得好淋，個醬汁整得勁入味，牛肉連埋飯都吸曬香濃嘅汁。飯面仲有芝士同埋藜麥，味道好有層次感。餐飲點咗京都焙茶鮮奶同瑰神茶，京都焙茶茶味濃郁，鮮奶好香滑。玫瑰茶亦相當大杯，花味香濃。餐廳食物質素唔錯，價錢好抵食，咁豐富嘅聖誕二人餐都只不過係二百幾蚊一位。