Lockeroom Express (已結業)

佐敦嘅🌸Lockeroom Express🌸係一間用足球做主題嘅餐廳。佢雖然望落唔大間，但坐得都幾舒服😬。佢類似自助嘅形式，要先去收銀處度揀嘢食同畀錢。等攞嘢食期間，呢度係有餐湯自己拎，仲要係任飲。呢度上菜嘅速度十分之快，唔駛幾分鐘就野食，嘢食嚟到仲係熱辣辣👍🏼。我哋要咗個活龍蝦松露忌廉意粉同西冷牛扒意粉做主菜。我覺得呢隻龍蝦比起一般酒店自助餐嘅龍蝦更加出色😋。佢面頭有焗芝士沙律醬，入邊啖啖肉而且仲係好彈牙，松露意粉嘅味道亦都好香😍👍🏼。塊西冷牛扒就超大塊，包你食得飽，而且煎得啱啱好，仲有好多肉汁。另外我哋仲叫咗水牛城雞翼，佢嘅酸辣味超惹味。最後甜品有特濃朱古力蛋糕，佢係慕絲朱古力再加薄薄既餅底，朱古力味香濃得黎唔會太甜🍫。總括嚟講如果想食個有質素嘅快飯，我真係好推薦呢間餐廳，簡直係快靚正😃。