禾牛薈火煱館 (金馬倫道)

营业中

休息中

一班朋友聚舊最好打邊爐邊食邊傾，黎到尖沙咀禾牛薈，卡位都幾闊落，裝潢光猛明亮，地板唔會痴笠笠，乾淨企理。首先叫左四川麻辣同珍寶豬骨湯底雙拼，麻辣湯內有鴨血、知竹等配料，好入味，湯底好香口，小辣唔算好辣，啱啱好。豬骨湯有胡椒香，比較家常嘅味道，專用黎淥菜。肥牛方面叫左至尊本地封門柳和頸脊，封門柳牛味好重，推介！頸脊好嫩，但牛味不太重，如只叫一款牛肉，可以不試。牛肉建議叫大碟，因為份量不算好大。我地俾侍應姐姐影響叫左封門柳同頸脊例牌各一碟，但黎到見到份量覺得應該一早堅持叫大碟！我地本身都係想食肉為主！搞到後來要再叫封門柳大碟，反而仲貴左！另外推介嘅火鍋料有豬潤、魚卜、牛胸爽、魚蛋、鴨血、凍豆腐等。豬潤切薄片，快熟鮮嫩！魚卜好新鮮！魚蛋係九龍城馳名魚蛋，鮮甜彈牙！飲品方面叫左啤酒塔，一邊打一邊啤，非常滿足。值得推介係菊花茶，好清潤解渴！