響 - Hibiki 日本燒肉 (已結業)

近年食親日式燒肉都係食牛角，今次就試咗佐敦嘅響，連埋加一每人五舊多啲啲都幾貴下。一坐低除咗幾盤有得任食嘅燒肉之外，仲有盤一次性海鮮拼盤同海膽刺身。刺身盤除咗海膽外其他都係任食，普通放題水準，有帶子同吞拿魚都幾驚喜，而個海膽都好大瓣下，食落鮮甜。至於海鮮拼盤，鮑魚同海螺都唔錯，最正係有兩條喜之次，第一次燒咁大條魚，燒完仲係好嫩滑唔會乾硬化仲好濃味添（唔知點解食落有陣粥味咁😂）相反燒蠔就差到爆，本身啲肉已經細到指甲咁，仲要超級腥愈燒愈臭，結果四個人每人一隻冇人入到口扔哂😂 還好燒到一半時，店家每人送兩隻大生蠔就好好多啦😗燒肉方面都係澳洲和牛系列，每種肉都有個牌寫住乜嚟幾好，但講真食落同牛角冇乜大分別，最愛依然係牛舌，不過無論寫幾多都好，牛舌只會嚟四塊，但所謂澳洲和牛就一定嚟八塊，邊樣值錢啲好易睇啦😏 仲有比較特別嘅骨付雞骨腸比想像中好食，豬頸肉都好食，仲好食過佢啲咩米澤三元豚系列😂熟食必推天婦羅，可能佢用返拎嚟燒果啲蔬菜，所以意外地高質，勁鐘意佢個茄子天婦羅😍 佢仲有汽水任飲有埋啤酒同紅白酒，雖然我唔飲酒，仲有movenpick任食添😍 唯一係啲服務，唔係話差嘅，但唔多似四五百蚊應有嘅水平