吉壽日本料理 (已結業)

颱風走咗，緊係要食番餐豪嘅~ 依間吉壽一出旺角站就到，交通非常方便，好啱一班三五知己黎落腳。食物種類豐富，有自助同點紙。自助嘅係前菜同甜品，點紙嘅有刺身、壽司、串燒、炸物、鍋物等等。一黎緊係率先試下刺身，每款都非常鮮甜，特別係三文魚，甘香嫩滑，帶子肥美飽滿，而八爪魚片口感爽滑，簡直一流！壽司方面，個人比較推薦鰻魚忌廉芝士卷同吉列大蝦卷，估唔到鰻魚同忌廉芝士可以咁夾，而脆口嘅大蝦配上鬆軟嘅米飯好有口感。依度嘅手卷都幾出名，唔係因為夠大，而係因為佢只係手指嘅大細，咁就唔洗太浪費，抵贊！最驚喜嘅係牛油蘑菇雞翼，睇落同普通雞翼冇分別，一咬發現入面包住咗勁多蘑菇。自助區可以自己夾沙律、涼拌小菜、水果、飲品、蛋糕仔、雪糕雪條等等，仲放咗一部雪糕機同埋配料，俾客人自己DIY整雪糕。