晴苑泰國菜 (已搬遷) 新店位置

老實講，黎得大角咀舊區食飯都唔會expect有乜野「賓至如歸」既服務。不過，呢度勝在「抵食夾大件」，晚飯由$40幾蚊既set到幾百蚊既套餐都有，可以話係豐儉由人。Anyway，餐廳地方都算幾大，佔左兩個舖位既位置，枱同枱之間都唔算太迫，以茶餐廳格局既食肆黎講真係非常唔錯。泰式海南雞飯︰坦白講，食唔到乜野泰式既感覺，似係普通海南雞飯再俾個泰式醬伴碟就算，有少少「hea」。不過，份量夠晒大之餘D雞既口感亦都唔錯。雖然已經有心理準備係冰鮮雞貨式，但煮法俾想像中好好多，冇乜雪味之餘重有少少調過味既口感，抵讚！至於飯方面就都係D一般野，冇乜值得一提。炸蝦餅︰非常喜出望外既小食，冇諗過$60幾蚊會有成8大舊，重要唔係扁既「蝦餅」而係大到成個「蝦球」咁！新鮮炸起既蝦餅熱辣辣之餘料亦都好足，咬落去既時候一D都冇坊間「成口粉」既感覺，果種爽滑彈牙既感覺真係超正，絕對係必試之選。Overall呢間餐廳俾我既感覺係sell食物質素多過sell環境，感覺就好似「那些年」九龍城果D泰式餐廳，非常有heart，絕對值得一試！