極尚大瀛喜日本料理 (已結業)

好耐冇食個放題啦，今日終於約埋朋友一齊過嚟食，之前食過觀塘嗰間，質素真係唔錯，所以今次約埋朋友過嚟銅鑼灣呢間試吓。五點半左右上到去已經好多人排緊隊，不過職員好好唔使六點鐘就已經安排晒入座。今次食完安排左我哋坐卡位，一行八人坐埋一邊自己玩自己笑自己食，真係開心。佢哋嘅前菜同冷盤嘅款式好多，有日式嘅，有沙律，仲有啲辣酒螺等等。。之前食過佢哋嘅芝麻雞翼好好食，今次第一樣叫嘅就係芝麻雞翼，佢哋揸到好脆好香，同埋好入味。芝士焗帶子一定要試，一口一粒，食入口又唔會覺得好肥，我哋八個人帶左成20幾個黎食，正。刺身就一定唔少得啦，不過我自己個人比較鍾意食三文魚，其他刺身就麻麻哋，所以我就俾唔到啲咩評價啦。芝士焗西蘭花又係我嘅至愛，芝士同西蘭花簡直係絕配，焗完出嚟啲芝士有少少燶燶地好香，一個人都可以食到七個八個。最後就係甜品同飲品類，佢哋嘅甜品款式好多有自製雪糕，仲有其他細細個嘅政治甜品。整體上呢個價錢同質素真係唔錯，最適合大班人嚟食，如果下次再有機會一定會再約埋成班人嚟食。