今日都要等位，等成20張枱，本身都諗住打定輸數，點知等左30分鐘就入得去，比想像中快。
一入到去，店員就俾左一碟蝦片俾我地。我地好似餓鬼上身咁，幾分鐘就食完，之後主菜都未上，就飽左一半，好後悔。
泰式牛肉船麵 $138🐂
主菜終於黎啦，呢個船麵非常足料，有牛柏葉、牛肉片、牛展、牛筋及牛丸，每個配料都好好食😋，尤其牛丸非常彈牙爽口，牛柏葉索晒啲湯汁，好入味，牛肉片都有質素，絕對唔係出面打邊爐既cheap cheap牛，成個牛肉湯非常濃郁，好重牛味，船麵一上黎已經加左少少辣椒粉🌶，十分惹味，唔鐘意食辣既朋友記得叫走辣。
黃咖喱軟殼蟹 $198🦀
一食入口就知係正宗既泰國咖喱，甜得黎又好香，仲要好足料，有四隻完整的軟殼蟹🦀️，炸得酥脆，即使浸係咖喱好耐，都唔會變到林晒，值得一讚，成個餸配飯🍚一流🤤。
椰青$48🥥
成個椰青大大個，份量都大，唔會飲兩啖就冇晒，入面d椰子肉好嫩滑，椰子水清甜，正👍。
總括而言，成餐飯都好好食，沒有一道菜令我失望，仲要係正宗既泰國菜🇹🇭，令你彷如去左一個短暫既泰國旅行，好想食泰國菜的朋友，可以黎呢間止下渴先，雖然呢間價錢都唔平，但勝在每道菜都好大份同足料，而且質素有保證，每一道都好好食😋，絕對值回票價。
