樂園 (已搬遷) 新店位置

啱啱同朋友行街行到攰攰哋，諗住睇下附近有咩地方可以坐下傾下計，結果一上網就搵到呢間樓上café，估唔到佢藏身喺一間商業大廈入面，真係可以話係鬧市入面嘅一片小綠洲。因為實在太肚餓嘅關係，一坐低就即刻叫左野食先，我叫左黑松露鮮菇意大利飯，佢嘅黑松露醬都唔少，但菇嘅份量/種類就比較少，不過令人驚喜嘅係意大利飯煮得啱啱好，軟硬適中，creamy 得嚟又粒粒分明，有al dente嘅口感，值得一試。朋友就叫左個煙腩蛋黃忌廉汁扁意粉（即係卡邦尼），佢話試下D基本野就知間café 得唔得。好彩呢度嘅卡邦尼無令朋友失望，意粉唔會煮得太腍，鹹度啱啱好，而且每一條意粉都沾滿左忌廉汁，同煙腩一齊食亦唔會太膩，味道恰到好處，朋友都讚不絕口。我哋仲叫左杯好香濃嘅榛子朱古力同埋酸酸甜甜嘅金桔檸檬，為呢餐飯劃上完美嘅句號。環境嚟講，呢度真係唔錯，好適合一班朋友上嚟享受聚下傾下計，而且依家嘅café通常都係得個樣，無諗過呢度嘅食物真係唔錯，絕對可以話係水準之上，值得encore。