緣味小聚 (金百利廣場) (已結業)

同阿妹去咗銅鑼灣行街，周圍行咗3個鐘，腳都軟埋，攰到唔想諗食乜，咁就去咗金百利搵食。最後決定食蒸氣鍋。上到去餐廳門口，見到有個易拉架廣告，原來都有做午市時段，唔知點心好唔好食架呢。餐廳環境唔錯，夠闊落，唔會坐到好迫。我地決定食豪D，點咗龍蝦蒸氣鍋套餐。睇menu就好多款式，本來懷疑夠唔夠食，後尾攞D海鮮食物嚟，就覺得好有驚喜啦。份量好多，D海鮮又夠大隻，望見到好開心。龍蝦有膏又多肉，蒸熟後味道鮮甜，每一口都係龍蝦肉，大啖食好正。鮑魚大大隻，爽口彈牙，好味。北海道元貝皇，唔好蒸咁熟呀，我個隻有少少過火，如果可以蒸到8-9成，就可以keep到好似shashimi果種嫩滑嘅口感。其他海鮮都好正常，蝦好食，龍躉有D骨，我就一般啦。仲有牛肉加上八寶飯，根本食唔晒。D海鮮真係有驚喜，份量好足，又新鮮，可以回頭再食。