鴻淘士多‧羅太豆花

营业中

休息中

呢日朋友們話要帶我去任食豆腐花，成日聽佢哋講話好味又抵食，終於有機會帶埋我去啦。地點位置都幾偏僻，我見好多單車友踩住單車咁入去順便食。大熱天時，徒步行入去，真係行到身水身汗。豆腐花同豆漿都係一個價錢就任食任飲。豆腐花好滑，豆漿唔會太甜，兩樣食物都好有豆味。不過我覺得最驚喜，反而係另一樣小食。我哋人多，所以仲叫咗煎豆腐同埋煎素鵝。因為佢係即煎嘅，所以要啲時間，我哋一入去坐低就即刻叫，等咗大概10分鐘左右就有啦。煎豆腐就冇乜特別，都唔錯嘅。但係個煎素鵝就真係好驚喜，超好食，煎到脆脆地，豆味好濃郁，再配埋個類似酸梅汁嘅醬，真係好食到停唔到口。佢只係$30一份，但係都幾大份，可以比兩至三個人share做小食。呢度嘅煎素鵝，暫時喺我食過最抵又好食㗎。