掌壽司 (已結業)

今日約咗個心儀嘅女仔食晚飯，朋友介紹左呢間位於駱駝漆既掌壽司，話佢地既二人餐性價比又高又好食，一於試試實力！結果當然完全冇令我失望，裝修同環境都好舒服，職員好細心咁介紹二人餐上今日既時令海鮮！原來女神bb原來食唔到魚生，但係職員好貼心咁叫師父燒熟啲魚同盡量用貝類海鮮，救左我一命！首先係個木瓜沙律！清新又開胃！跟著就到刺身船，食材十分新鮮，拖羅又肥又厚，認真食完個刺身拼盤都已經飽左一半，但係只係美食之旅既開頭！又點可以咁快飽，跟著黎既壽司，女神只可以食火炙壽司，但係所有熟既壽司都做得好好食，個火燒金鎗魚香到不得了，海膽軍艦塞到滿哂一啲都唔孤寒！一咬就係幸福嘅感覺！然後再黎既壽喜燒同埋燒紅魚, 牛係澳洲既m9和牛，牛味又香又濃，豬係鹿兒島既，軟！滑！到最後既甜品係靜岡既蜜瓜，剛剛好解哂之前食既好多油膩感，埋單都係4百蚊個頭左右，有咁既服務，好過去食放題好多好多！