九重町日本料理 (已結業)

今日去探個朋友，佢就提議落去佢屋企樓下度食日本料理，我都好耐冇食啦，咁就一於同佢去食呢間日本餐廳。首先食清酒煮蜆，蜆肉質地彈牙，煮到剛剛熟，食落充滿鮮甜味道，仲有微微嘅清酒味，將蜆肉本身嘅腥味辟除，加上蔥花，食落零舍清新。跟住係野菜牛肉鍋，除咗主角嘅牛肉之外，仲有其他配料例如雞蛋，京蔥，雜菜，蘑肉，金菇等等。肥牛肉食落非常滑口，加上雞蛋嘅點綴，令牛肉食起上嚟緊加覺得滑，仲有京蔥同唔同嘅蔬菜菇類，個湯底份外甜，食埋蔬菜加上飲幾啖湯，咁凍嘅天氣就零舍暖胃啦。最後就係海膽海鮮炒飯，呢份炒飯用料十分豐富，除咗海膽之外，仲有三文魚同埋比目魚，仲有其他雜錦海鮮，所以食落充滿海鮮味。三文魚肉同比目魚魚肉夠爽滑，食落新鮮，而炒飯炒得非常甘香，加埋新鮮嘅海膽，甜中帶滑，仲有海膽獨有海水味，令炒飯更加錦上添花。