樓下冰室 (已結業)

豬潤麵，除咗深水埗出名之外，荃灣都有好選擇，今次為大家介紹喺荃灣路德圍嘅樓下冰室。坐港鐵喺荃灣A1出口行5分鐘左右就到，交通方便。去到餐廳門外，約十多人排隊，等食唔係問題，即係餐廳Ｄ野好食。入到餐廳，一陣陣蕃茄味湧埋嚟，朋友話餐廳主打蕃茄，連個招牌都用蕃茄，唔食佢點得呀！睇睇餐牌，吉列豬扒飯、瑞士雞脾飯、瑞士雞翼飯、咖哩牛腩飯，50蚊右左嘅午餐，唔算太貴，每樣都好想食。今次就叫咗個蕃茄濃湯豬潤麵加牛乳炒蛋同埋咖哩牛腩飯，再加咸檸七同柑桔蜜。炒蛋好多餐廳都有，但係依間就加咗牛乳，口感豐富咗好多。豬潤加咗蕃茄湯，每食一啖都有酸酸甜甜嘅感覺，再加上豬潤爽口，我連湯都清埋。朋友話佢食嘅牛腩飯咖哩味十足，唔太辣，加上牛腩半肥瘦，份量又多，驚喜推介，抵食。