湯•米 (已結業)

之前換身份證時經過依到，見到有間台式一人一鍋好似唔錯，今日天氣太熱唔想煮飯，約埋太太試一試佢。湯米位置都好寬，張枱夠大，點幾多都一定放得曬食物。點左招牌臭臭鍋、沙茶牛肉鍋，見佢個巴蜀烤魚鍋好似幾吸引，出面都唔多見有，但由於今晚好想食肉，就唯有下次先喇！加左豚肉、麻辣臭豆腐、酥炸花枝墨魚丸、芝士奶蓋四季春。出面有自助醬料，佢個蒜蓉超香，溝埋醬油，用黎點餸一流。臭臭鍋有皇冠標誌，加上寫住no.1 必試。喜歡臭豆腐既人一定會愛上，臭香味好夠，一上枱已聞到陣陣臭味。鍋睇落不大，但入面的餸菜超多，好豐富，牛肉都有5-6片，絕對夠飽。沙茶牛肉鍋，沙茶湯底濃郁，沙茶本身都可以用黎做醬料，依個湯底唔洗點醬，食物都夠曬入味，配埋粉絲好滿足。豚肉打邊爐都好正，所以追加左，食落同牛肉一樣有質素，食肉獸不妨一試。麻辣臭豆腐，見佢面頭怖滿辣椒，睇落好辣，但食落又岩岩好，唔食得辣既人一樣可以食。依種做法吸曬汁，食落唔會好dry好唔錯。酥炸花枝墨魚丸，炸到脹卜卜金黃色，面有椒鹽粉好惹味，肉質彈牙。芝士奶蓋四季春，茶好清香，用黎解渴一流，奶蓋都好夠芝士香味，一杯飲品，兩種滋味。