麥金.麥金馬來西亞特式茶啡室 (已結業)

近來真係開咗好多馬拉餐館，今次嚟到大角咀呢間，感覺同深水埗嗰間好相似，但係我覺得呢間好食啲。首先一定要嗌嘅係佢個肉骨茶啦，佢喺未上正式嘅肉骨茶之前已經比定一碗湯嚟飲。最鍾意藥材味嘅我覺得非常好飲，藥材味好夠濃，而且唔會好油膩，成餐飯我應該飲咗四碗湯左右啦。另外一定要嗌嘅就係咖哩麵啦！佢比較特別，唔係一般有米粉又有油面果種，而係剩係得油面係碗湯入邊，椰汁味好重，入面啲雞非常嫩滑好好味，好易入口。最期待嘅就係佢個伽央多士，伽央多士最緊要係個包烘得趣，而佢入邊嘅醬料又唔可以太甜，加埋一齊真係一絶！講到馬拉點可以唔係拉茶同咖啡呢！呢度嘅拉茶真係非常出色，又唔會好似泰式奶茶咁甜，但係又有一種好香嘅茶香味，十級推介！不過咖啡就好似咖啡味唔係太夠，奶味偏重，但係相信都會有唔少人鍾意飲嘅。