星怡 (已結業)

一直想試下星怡，但一直未有機會。今晚卻突如其來黎到食個晚飯。因為朋友被炒魷，被急call吐苦水。裝修以淺藍色為主，幾舒服。餐牌選擇好豐富，馬來西亞特色菜都有齊。我地點了幾樣輕便的小試牛刀。馬來炸大雞脾椰漿飯，雞脾真係好大隻，大過我塊面！望落好香脆，食落雞脾仲係好juicy。飯上有煎蛋，配椰漿飯夠濕潤。特級北海道帶子鮮蝦喇沙麵是其招牌菜之一，肉眼望落已經好濃郁，食落仲濃，汁底好濃，有好香椰味，而且辣度好夠。鮮蝦有3大隻，巨型帶子有2大粒，絕對俾足料！斑蘭咖央多士好好食，斑蘭醬同牛油完美結合，多士香脆，牛油仲係一塊未溶，出色之作。馬來西亞拉茶，有多士當然要配拉茶，雖然唔係用上特色杯，但味道濃，甜度又剛好，送多士最適合不過。黑糖寒天椰汁冰一大杯好足料，椰汁味好香，寒天有咬口，食完喇沙飲啖解辣最好。紫色迷戀為朋友消氣而點的，雪花冰香芋味好出，爆珠、蒟蒻、啫喱、棉花糖等增加口感，飯後甜品適合不過。