8鍋臭臭鍋 (金巴利道) (已結業)

上次經過臭臭鍋已經想試下，見今日天氣又轉涼，所以就決定去臭臭鍋試下。等既時間唔算耐，等一陣就可以坐低。依度係可以一人一鍋咁叫，而火鍋既種類都算多，可以比大家選擇。《芝士牛奶鍋》：因為唔係太食得辣既關係，所以就揀左依個黎食。而入面既材料分別有豬肉片、心型魚豆腐、蛋餃、台灣貢丸、麻吉燒、沙白、香菇、大白菜、蟹柳、炸枝竹、金針菇、鳴明卷、雞蛋、烏冬同芝士片。一個咁細既鍋，就有咁多材料係入面，見到已經好滿足。食火鍋最緊要就係湯底啦，湯底有濃郁既芝士味同牛奶味，好飲。另豬肉片好有𡁻口。麻吉燒質感煙煙靭靭，感覺好得意。而蛋餃就索滿左湯既精華，特別入味。而所有材料唔點醬油都已經好夠味，送飯真係一流。《香蒜牛肉鍋》：依個鍋入面分別有牛肉片、蟹籽丸、甜不辣、牛丸、凍豆腐、粟米、金針菇、炸枝竹、粉絲、鳴明卷、翡翠魚豆腐、蕃茄、粉絲。湯底方面，有好濃既香蒜味，而我本身對蒜蓉類既野特別鍾情。牛肉片好薄好有牛味。蟹籽丸索滿左香蒜既湯汁，正。翡翠魚豆腐好彈牙。而最正就係入面有粉絲，粉絲索滿左香蒜湯底既味道，好好味。今晚真係食得好滿足呀。