頂好食家

营业中

休息中

一行六人由愉景灣行去梅窩行咗五個鐘頭，好肚餓，見到呢一間茶記就入咗去，之前完全未食過，見到牆上貼住整齊嘅餐牌，種類廣泛，唔係剩係得麵餐同埋碟頭飯，佢哋竟然有雞尾包，越式肉餅雙蛋飯，同埋素食選擇！行完山例牌會整個餐蛋公仔麵，啲friend仲癲要食回鍋肉餐肉公仔麵同埋西多士補番啲腳骨力，我就係因為太熱食唔落湯麵，所以叫咗個餐蛋治走油烘底。一間村內小店喺西多士上面竟然俾你選擇煉奶或者糖漿，對我嚟講係誠意嘅表現，先攞一分👍我個烘底三文治面有靚坑紋，叫佢走油真係記得，餐肉煎得夠脆，再攞一分，朋友嘅回鍋肉餐肉公仔麵，裏面有兩塊煎到脆面嘅餐肉同埋足夠份量嘅回鍋肉加筍，公仔麵底有咬口，再加分，最後係奶茶個茶底夠香同應有嘅澀味，我心滿意足了。唯一係個凍奶茶在落糖方面重手左，所以嗌第二杯時要減甜。樓面幾位姐姐仲同我哋有傾有講，人情味滿滿，又記得我哋每個人嘅仔細食物要求，好照顧客人，香港傳統嘅茶記應該係咁。很滿意的一餐，多謝你哋。