時新漢堡飽 (已結業)

其實我細細個已經聽過時新漢堡包呢個名，聽問聞佢啲漢堡包非常好食。好耐以前我已經好想試，不過以前交通冇咁方便，所以一直都無食過。最近同朋友傾開原來佢同我都係一樣好想試，大家約埋一齊去黃埔食。而家交通好方便，有地鐵啦。餐廳環境都幾寬敞，坐得都舒服 ，餐牌有好多食物選擇，價錢仲好大眾化，食得飽飽都所費無幾。囡囡叫咗兒童餐，有細包維他奶，薯條，漢堡包同一個啫喱仔。我同朋友就叫咗雞翼，沙律，羅宋湯一齊分享。羅宋湯好味道，少少辣辣地好開胃。我點的是雙層芝士蛋漢堡，選了牛肉，牛肉好香濃牛肉味 ，好juicy，配時新醬酸酸甜甜，非常惹味，難怪咁多年，時新都係香港人心目中經典嘅漢堡包。