快樂小羊火鍋餐廳 (裝修中)

食快樂小羊真係好快樂，唔單止落地玻璃景觀開陽，樓底高令到整體空間感打滿，最快樂係一大碟肥羊竟然只係$28，性價比超高！而家個個都要返深圳打邊爐，但係其實留港消費一樣有抗通脹良心火鍋店😍講吓食物質素，雖然價錢貼地，但係食材依然保持中上水平，點咗個鴛鴦鍋底，金湯鍋底仲要送多一碟肥牛，辣湯底亦都非常之惹味，用嚟烚魷魚一流～巴沙魚非常嫩滑，入口即溶又有魚味😋墨魚滑蝦滑打得好彈牙，鮑魚都好抵食有海水味又新鮮！最正係平時叫粟米娃娃菜都要三四十蚊碟，呢度嘅蔬果瓜菜bar竟然係自助放題任夾唔嬲，真係如果想平平哋食，狂食蔬菜都回本！整體而言，餐廳如果平平哋齋叫羊肉，然後叫金湯鍋底送一碟牛肉嘅話，每人百幾兩百蚊已經可以食飽，當然如果叫啲鮑魚等等就會貴少少，但係都係非常經濟。餐廳仲做緊優惠活動送楊枝甘露，有甜品食羊肉又抵地點又方便，推介大家約埋朋友仔一齊嚟打邊爐啦🤩