Cocolo Tokyo Cake Factory (利東街) (已結業)

今日等上堂，無聊就喺利東街周圍行吓街，到咗下午茶時間有啲肚餓，見到呢間甜品店有幾多人排隊，就黎試吓啦。呢度主打蘋果批，另外亦有啲蛋糕仔。咁今日就試咗一份酥皮蘋果批（ $33 ），中間係一粒粒蘋果粒，外面就係薄脆嘅酥皮，熱辣辣，而且聞落好香好吸引，果然無揀錯。另外一份揀咗特濃芝士蛋糕（$35），但係可能因為擺雪櫃耐左，中間部份有啲起冰粒，有啲似擺耐左嘅雪糕。不過除此以外芝士係都真係幾濃味。呢度飲品都有好多款式，除咗咖啡之外仲有波子汽水，下次有機會都可以試吓。呢度其實係有少量座位可以即食，不過我見咁多人，就出咗去利東街開放地方食啦。