樂糖 (已結業)

特登走入將軍澳探朋友，佢請我哋食飯，我哋就請佢食甜品啦。不過，我哋對將軍澳唔熟，對唔熱衷嘅甜品就更加無idea，所以都係朋友帶路，帶我哋去到位於天晉嘅樂糖。餐廳以彩色氣球作佈置，色彩繽紛。除咗甜品，原來仲有意粉、薄餅同輕食。

桂花荔枝水信玄餅
水信玄餅有3款，M佬就叫咗桂花荔枝水信玄餅。桂花嘅清幽獨特香味，配上荔枝嘅清甜，又脫俗又驚喜。仲會附上雲尼拿雪糕同花茶一杯呢。

菠多椰皇
M佬一聽到菠多即刻嘴角蹺起，我其實講緊菠多椰皇囉。兩大塊微焦嘅菠蘿酸酸甜甜，夠晒醒胃。椰皇入面有椰奶、海燕同薄荷葉，椰味香滑突出，清新解喝。

芒果隊長
芒果基本上係甜品之皇，食親甜品又點可以無芒果呢？呢位芒果隊長，除咗有切粒芒果，仲有雲尼拿雪糕、海澡珠、乳酪爆珠、煉奶同脆米，夠晒豐富又有層次。