吞POT 雞煲火鍋.住家菜 (譽發廣場) (已結業)

呢日，因為屋企冇人煮飯，所以我就同我爸爸出咗街食，咁我爸爸就鍾意食中菜，但係我又想打邊爐喎。於是就搵到呢一間，有花膠湯底嘅邊爐，咁就兩個人嘅願望都滿足晒啦。咁我就叫咗一個花膠螺頭雞湯， 裏面有好多花膠，啲螺頭切都好細粒，個味好出，而裏面有半隻雞，啲雞都好滑。我爸爸平時食嘢都會話出面啲嘢多味精，但係今次佢竟然冇講個湯底有味精，而我都覺得個湯飲完之後一啲都唔頸渴，仲覺得好潤添。相信個湯底都真係好足料，都真係幾好幾好飲㗎。其實食完隻雞之後，再飲埋啲湯已經好飽，不過都想試吓呢度嘅招牌，咁我叫咗個芝士響鈴同埋手打丸個芝士響鈴又真係幾好食㗎，浸一浸拎返上嚟，裏面啲芝士已經溶溶地，小小咸親埋個響鈴，真係比平時更加好食。個手打丸我就覺得冇乜特別，同出面食嘅差唔多。