北京王府水餃 (已搬遷) 新店位置

兩個人冒著雨行過黎食餃子，一坐低就勁點左幾味野，好似唔知飽咁，order左一個炸醬麵，雪菜肉絲麵，蕃茄蛋餃，羊肉餃，皮蛋豆腐，芝麻餅，後尾就知死喇。兩碗麵都算係大size，我碗雪菜肉絲絕非粗製濫造，雪菜並非一味死咸，而肉絲係手切成絲再煮，好入味，麵條亦相當有口感，不俗。炸醬係北方風味，同麵棧差唔多，亦係甜甜地，入口開胃。蕃茄蛋餃入面既餡鮮味充足，蕃茄又係用人手切粒，咬落茄汁豐富，加埋芫茜味道好夾。而羊肉餃肉汁濃而京沖亦令餃子更惹味。兩款餃子都係皮好薄，唔似北方傳統既厚皮o個隻。皮蛋豆腐既皮蛋好難食，入口好乸喉，唔得。而芝麻餅過咸，麻麻姐。同其他網友一樣，係呢道不知不覺間會同老闆娘用普通話交談，以為自己真係食緊北京既小麵店。