今助烏冬御膳 (已結業)

早幾日排隊食黑夜壽司，發現側邊呢間烏冬鋪好似好正，多嘢食之餘價錢又可以。所以第二日特登出旺角食番，不過失望而回。一心嚟食烏冬，但食落去真係好一般。男友叫咗牛肉烏冬配刺身飯茶碗蒸，一嚟到望到牛肉烏冬就feel到頹頹地，果然，啲牛肉老過柴皮。後上嘅茶碗蒸唔錯，啲蛋好滑好滑，不過無咩蛋味。結果佢差唔多食完，我果個牛肉烏冬鍋刺身天婦羅定食都未到。嚟到之後好驚喜，呢間鋪唯一一樣值得讚嘅就係實物與圖片相符。一樣咁大份，一樣咁靚。牛肉烏冬鍋入面竟然係配生菜！成件事勁怪。都唔緊要，個烏冬似足刀削麵，粗但唔彈牙。老老實實，我覺得大昌買嘅急凍烏冬仲好食。（戴個頭盔先，可能係我唔識食，呢啲先係真正日本味道）刺身一般般，天婦羅舊「蕃薯」，我都分唔清佢係芋頭定蕃薯，又硬又粉。如果想食一餐豐富嘅，呢度還可以，但質素真係麻麻。