馬華餐廳 (已結業)

都有好一段時間冇黎呢間食店, 咁啱早幾日屋企人提議黎呢度, 師傅見咁耐冇黎過, 於是就投左贊成票! 放飯時間入到去都唔算好多人, 可能禮拜嘅關係, 大部份人都去晒飲茶; 入到去一坐底就睇下有咩好食啦, 淨係睇到個午餐已經夠吸引, 最後師傅揀左二號餐, 香煎巴西雞扒餐跟白飯, 配埋黑椒汁, 而餐湯就要左紅湯, 試下佢得唔得啦!先試下佢個紅湯, 湯料就真係幾多, 而味道就幾好, 不過如果可以再辣d就仲正; 黑椒汁配香煎巴西雞扒, 雞扒都幾大塊加上煎得好香, 肉身又非常嫩滑, 入口鬆軟, 掂呀; 再配埋黑椒汁夠香夠辣, 真係好鬼惹味, 送飯真係一流!總括黎講食物質素不錯, 環境就一般啦, 服務都可以啦, 午餐價錢都幾抵食, 有餐湯, 主菜又有餐飲, 都係三十一蚊, 不過有加一; 通常禮拜日都係飲中茶, 而今次改為飲西茶, 感覺唔錯; 加上咁耐冇黎過, 所以份外開心; 有機會一定再黎食過, 笑臉可以一比!