粵廚點心專門店 (已結業)

今日個老友嚟我屋企探我，本身想同佢去飲茶既，不過而家肺炎情況之下大家都唔想去太多人地方，就嚟到係正樓下既點心專門點食晏，其實之前已經想食，但一條友又食得唔多，所以今日岩曬喇，終於有人陪我食。點心紙簡而精，酒樓熱門野都齊，價錢都可以接受既，不過就無得開茶慢慢嘆既，坐低店員會問你想飲普洱茶定綠茶，然後就每人一抔好似茶記咁，茶既種類少，所以飲茶氣氛欠夆，但都坐得舒服既。馬拉糕好鬆軟，甜度適中，香味差啲，但份量夠大，保持到濕潤，唔乾身，唔錯唔錯。叉燒腸好淋好滑，腸粉皮夠薄，足餡料，芫荽就比較少，但岩曬我，我唔鐘意食芫荽，叉燒甜甜地，用既係瘦叉，就咁食淡左d,加鼓油同辣椒油就夠曬味喇！燒賣好好食喎，鮮蝦同肥豬肉絞碎，但係又未至於好碎，仲有蝦膠既質感，上面嘅蟹子比係酒樓嗰隻點綴式既份量多一半，一啖一粒yummy !鹹水角外脆內軟，好食過酒樓多多聲，美中不足嘅就係餡料嘅味道就偏鹹，但外皮好香好煙韌。同埋餡料好少。。。鳳爪蒸嘅時間未夠，骨肉未分離，所以好難Lun骨。味道就重口味無雪藏味既，豆豉味同椒味都無乜，主要係甜醬汁味道。食咁多嘢先每人都係60蚊左右，抵食過去飲茶啦！