十里洋場 (已搬遷) 新店位置

上年聽朋友講呢間嘅大閘蟹抵食又好味，可惜我收風太遲，完全爆滿，book唔到。足足等左一年，今年佢一出大閘蟹套餐我就即刻行動。終於俾我試到。點講呢⋯⋯折實價人頭$600一位，食物嘅質素同份量係ok嘅，如果隻蟹可以大返少少就更好（當日果隻我唸最多5両）畢竟主打都係食蟹。蟹黃翅、蟹斗、蟹粉炒飯都相當不俗。反而個鮑魚拼鵝掌有D格格不入。佢味道份量都無問題，而且好味㗎，不過我就覺得如果多一隻蟹而少呢味餸可能會更盡興。唯一令人感到可惜嘅係，佢只有一個半鐘嘅用餐時間。食大閘蟹，從來都係一件好需要耐性嘅事。由拆蟹到品嚐都需要時間，更何況整個套餐由頭盤到甜品總共7款，你叫食客點可以輕輕鬆鬆咁去享受呢一餐飯呢？我地當日呢，7 道菜一直係咁送上黎，侍應又好急咁收走用完嘅碗碟，基本上整餐飯都係係不停上碟，不停收碟嘅情況下進行。咁嘅價錢，如果食到咁急，我唸有好多其他餐廳可以考慮。撇開時間唔講，呢餐飯嘅質素係好嘅。希望負責人睇下可唔可以調整到個用餐時間，客人可以食得安樂之餘，餐廳同時又可以做到理想業績啦！