神輿日本料理 (已結業)

同朋友都好耐無一齊食放題，因為人大左始終唔似以前年輕時咁暴飲暴食又食極唔飽咁！今晚嚟到旺角呢個唔少放題既地區就試下創興廣場５樓既呢間神輿日本料理。店內其實面積都幾大，裝潢都帶點日式風格。飲品係任飲，有可樂/雪碧/LOTTE 錫蘭檸檬茶/LOTTE 忌廉溝鮮奶，如果想飲熱飲亦有熱抹茶同熱玫瑰茶等。店內食物選擇唔少，刺身選擇有三文魚，吞拿魚，八瓜魚，松葉蟹棒，帶子，帶靈魚，馬刀貝，甜蝦，油甘魚，北寄貝同象拔蚌等。三文魚都幾肥美，甜蝦亦都爽口。其他壽司仲有燒牛肉，花之戀，芝士鰻魚，火灸三文魚，以及唔同既軍艦，卷物等。一品料理又有燒一口牛，豚肉燒等。食物選擇唔少，天婦羅，燒物，炸物等應有盡有，不過食唔到太多所以無叫太多，費事浪費食物嘛，叫自己食到既份量就足夠。芝麻炸雞翼，炸得香脆，肉質亦都幾嫩滑。除左壽喜燒之外仲叫左呢碗海膽炒飯，份量確實唔少呢。甜品除左有和菓子外，仲有雪糕，朋友食紅豆味而我就食綠茶味，都唔錯既，綠茶味甘香亦帶點奶香。放題唔同時段唔同價錢，最平只係$168起！整體嚟講食物選擇唔少，絕對食得飽離開。