陳小館 (已結業)

平安夜周圍都好Full，又唔想食西餐聖誕餐，搵到呢間新開小菜食評唔錯就嚟試試。我哋三個人未夠六點就到咗，佢大部分都係卡位，坐得算闊落，而且都好乾淨企理。餐廳日頭就做點心，夜晚做小菜。茶有得揀菊花，可以清下熱氣。我哋叫咗一個細羊腩煲，小炒王，蜜桃骨，同一個桶蠔煲，本身羊腩煲就已經送生菜。而落單侍應提我網上訂位優惠已經係送個蜜桃骨，我自己都唔知🤣侍應哥哥都好有禮貌，又提我哋叫呢幾樣已經夠食。一開始嚟咗個羊腩煲，不過要等佢滾一陣先，跟住就嚟其他餸，咁就食住等個羊腩煲。首先小炒王就好一般，有蝦乾同魷魚乾，比較咸，同都好乾，菜又比較油，我自己比較鍾意岀面食過加新鮮魷魚又有啲腰果嘅咁。跟住到個蜜桃骨，呢個都唔錯，冇咕嚕肉咁酸，有肉，唔係得骨。之後到個薑蔥桶蠔煲，呢個就真係好正，熱辣辣，好似有六七隻桶蠔大大隻，炸完外脆內軟，個薑蔥汁味道又啱啱好，呢個好值得推介。到羊腩煲，呢個又係非常好，細煲都夠三個人食，有好多羊腩，枝竹，冬菇，馬蹄，仲有荀，好足料，佢個汁個味道好好，初初覺得可以再濃啲，開蓋滾一陣收少少水就啱啱好，羊肉好淋，有少少羶味，正，另外啲配料都好入味，特別係冬菇好厚肉，勁好食。最後只係四樣嘢