好食雲南米線

营业中

休息中

前兩日去荃灣口痕想食米線，就隨便行入呢間叫好食既舖頭，想睇下係咪真係咁好食。入去嗰陣係12點幾1點，人唔算多，唔洗等位但每張枱都幾乎有人。咁雖然話就話口痕想食米線，入到去見到有功夫麵揀，就想試下咩黎，所以最後我係嗌左碗雞肉生菜功夫麵麻辣中辣，再加杯凍豆漿。上枱見到個碗既大細同連鎖米線鋪差唔多，而兩個餸既份量就偏多，望落都幾滿意。將個麻辣撈勻之後，試左一啖個湯，我個人就唔覺得辣，但要讚一下個功夫麵幾彈牙，雞肉亦煮得啱啱好幾好食。而豆漿呢，我都明白唔係間間米線鋪既豆漿都好飲，但呢杯真係稀得黎得糖水既甜味，建議可以考慮採購現時其他米線小店既細枝裝豆漿。而朋友嗌左金菇米線酸辣小辣，雖然金菇係圖度好似有保護色咁，但個份量都唔少架！最後就係講下最影響今次評分既衛生同服務。現時既防疫政策係餐廳坐位既一半以及四人一枱，以及入坐前量體温。當我同朋友食到一半，樓面同事叫我攞開背囊俾另外兩位客人坐既時候，我都禮貌向樓面表示我唔想搭枱，自問當時我既語氣同態度都尚好，但樓面同事表示張枱可以坐4個人以及可以提供隔板，所以我都有合作攞開背囊。但去到最後，樓面都只係拉開左我半隻食指既距離，而隔板就從頭到尾都冇出現過。