Munch (已結業)

星期六勞動完同同事嚟呢度食下午茶。裝修一般，一見到個menu都打個突。見咁嘅格局同啲侍應啲面口，冇諗過要卅幾蚊杯飲品，成四十蚊件三文治。不過既然坐低，唔通走咗去咩，慢吓手杯水佢都當檸水收我廿皮一杯啦。叫咗件扒火腿芝士意大利包唔知乜芥末汁。叫嗰陣其實冇乜期望，個心仲諗，卅幾蚊件芝腿治，香港人消費能力真係高到哩。三文治嚟到，又真係幾好食，尤其個意大利包，出面脆脆哋，入面軟熟。唔可以話佢值卅幾蚊，不過又真係比我預期中好食好多。相比之下，飲品就真係一啲都唔值。服務方面…雖然係會斟水會剩，但係收咁嘅價錢，除咗食物，服務態度好少少都應該吖。入去冇人歡迎，走冇人多謝，斟水唔出聲就咁隊個jar埋嚟，擺低嘢食嗰陣連飲品食物名都唔講，一個二個木口木面。坐咗成粒鐘，除咗佢哋自己講嘢嗰陣，我冇見佢哋笑過。同事話上次嚟食晚飯，侍應啲態度一樣唔掂。舖仔細細，開喺橫街，除咗嘢食用心，服務都應該用少少心吖。