樂天皇朝 (將軍澳中心)

营业中

休息中

將軍澳中心經歷一段長時間嘅裝修之後，有好多大型連鎖食店進駐。之前只係幫襯過銅鑼灣分店，今次就試下將軍澳呢間。芝麻醬油麥菜用青瓜捲住新鮮嘅生油麥菜，點芝麻醬，食落好似日式沙律咁，好fresh嘅感覺，冇草腥味。木樨肉炒拉麵有肉絲，木耳同椰菜絲，味道似上海粗炒，不過係炒拉麵，正正常常。心太軟材料簡單，紅棗夾住糯米，但味道又好夾，軟軟哋，好有咬口，食唔停口，係份量少啲。淮揚三絲春卷齋嘅春卷，裡面包住小小菜，涵料唔算多，冇汁點，都係鍾意食傳統春卷點喼汁多啲。風味沙拉排骨不過不失，最重點的沙拉醬唔算好好食，茶記嘅沙拉骨好食啲。黑糖流沙小籠包新產品推廣，試一試，但唔試好過試。小籠包皮包住黑糖汁同埋椰絲，完全唔夾，個配搭好怪。最後，講一講服務，真係好一般，大部份時間啲侍應都係圍埋喺側邊傾計，要搵個人嚟都要睇佢幾時傾完之後望過嚟先見到。