亞萊泰 (淘大商場3期) (已結業)

鐵版滷水無骨豬手一上台就聞到好香豬手味，鐵版上仲會炸炸聲但因為有椰菜喺底所以唔會燒燶豬手。豬手本身都冇骨所以食個陣真係啖啖肉好爽，而肉質結實豬味濃，豬皮部份又唔會太多肥膏，而家晚市仲有優惠所以真心抵食!小食併盤(小)有魚餅、蝦餅、春卷同埋肉丸，都係新鮮炸起所以都脆卜卜，尤其係蝦餅好出色，唔會太油又好香濃蝦味!馬沙文咖哩牛腩咖哩好濃郁同埋牛腩量好多又唔會痴牙，全部都係細細粒可以一口一個，再加上有少少沙嗲醬既味道，層次好豐富!我地另外再叫咗蒜蓉包，真係絕配既味道，個包炸得好金黃鬆脆而蒜蓉包好突出，再加上咖哩真係生色不少!冬蔭公湯(小)有大頭蝦同埋好多菇，濃郁湯底飲得出蝦既鮮味同埋精華，辣度比起一般既冬蔭公高不過都仲可以接受到，餐前飲完勁開胃!蝦頭油炒飯見到呢個飯好特別所以決定試下，有好多細細粒既紅蝦仔，蝦味超級突出，可以令成個飯都好有鮮味，加埋有唔少既魷魚同埋其他海鮮，蝦頭油都唔會係太油既口感，值得一試又特別既泰式炒飯!