愛 . 添 (已結業)

側聞有間台式甜品店開佐，想去試下。第一次去，冇人，好開心，然後有個講正宗台灣口音普通話既囡囡出黎話清潔緊，未開。So sad，但台式甜品店有台妹喺度，好有期待添。第二次去，嘩！只見龍頭，龍尾呢？唔知去到邊！當日好趕，算！第日再食過！今日第三次去，去到之時，有一對男女喺門口等緊，冇耐，佢地入佐去食。我同老婆繼續喺門口等。等佐一段時間，有個小姐行佐近門邊望佐望，跟住行返入去。再等佐一段時間，幾個後生仔女到佐，其中一個男仔行佐入去囉飛，吓？乜原來唔係排隊，係攞飛？我行入去問個小姐，佢竟然答我唔知我喺門口係等緊位！OK!原來我企喺門口成個鐘係黎食風架！咁點解你頭先行去門邊唔問下係咪等緊位呀？不過又即管睇下你啲嘢食係咪值得我等咁耐，又要受呢啲氣。入去點佐個綜合燒仙草同海燕椰皇（配芋圓地瓜圓）。個椰皇...er...咪就係椰皇咁樣囉，冇咩好影，不過......乜依家啲芋圓地瓜圓咁貴咩？得嗰細細粒，仲要得四粒！？燥燥地，最適合食凍嘢，個燒仙草都算合格既但由我攞飛到我埋單，佢地對頭先既安排失當連一句道歉都冇囉，收得！