大渣哥茶記 (已結業)

平心而論，我覺得食物水準真係只可以俾OK，並唔係好多人所講咁好味。如果齋睇食物水準同埋價錢，的確係可以選擇去其他茶餐廳。▫️黑牛黑麵 (HKD55)全日供應嘅「黑牛黑麵」套餐，有一碗「收嗲鮮牛肉麵」- 即係沙嗲牛肉麵，丹麥多士、煎蛋或炒蛋，跟一杯熱飲(凍飲要加錢)。沙嗲味唔夠突出，不過啲牛肉係幾滑嘅。碗麵真係幾大碗，相比之下牛肉嘅份量就少咗啲喇。▫️幻彩詠西多 (HKD39) - 件西多似一早炸好咗，咬落口有啲硬🙈 三款醬裡面我哋揀咗朱古力味。其實件西多士本身已經好甜，加埋朱古力醬一齊食真係甜上加甜。如果係為咗令份西多士個樣靚啲嘅話不如就咁灑啲sprinkles算啦。下午茶時間叫呢份西多附送熱奶茶或咖啡。▫️McJargor’s 乜樂雞 (HKD41) 嘩～ 呢份乜樂雞好有嗰種喺超市急凍雪櫃買番屋企自己用微波爐叮嘅Feel。可以有幾好食你啲自己諗吓😝 鍾意食薯條嘅話一定要點呢個，有多過半碟嘅薯條俾你食。乜樂雞下午茶時間先至供應，冇跟飲品，對我嚟講算係貴囉。