Olive Cafe

中午諗夜晚食咩好, 同大少講不如食西餐, 諗起之前朋友介紹過呢間Olive Cafe, 即管搏一搏打去睇下仲有冇得book枱。可能我地訂6:15算早, 所以仲有枱, 職員好好人, 響電話度提我地用citibank信用卡響8點前埋單可以全單85折! 成日去荃灣都會經過, 但就未入過去食野, 今日終於有得試。

一坐低, 店員就介紹廚師推介同晚餐, 有禮貌同有笑容, 令人感覺舒服。我地決定要一個set dinner, 加多個頭盤同意粉, 落order時我問左店員好多問題, 佢都好有耐性同笑容咁回答我, 冇鞋口鞋面, 值得一讚! 食物水準一流, 價錢合理, 試過一次之後已經成為我既心水餐廳!

麵包配油醋及香草牛油

落完order, 店員先送黎兩件烘得外脆內軟既核桃麵包, 點橄欖油同黑醋食極之perfect, 但最估唔到係附上既牛油加左香草, 要加分! 又要點油醋, 又想食香草牛油, 唯有將本身唔算大件既麵包撕開一半食晒兩種味道!

薯蓉忌廉湯

餐湯係薯蓉忌廉湯, 好香, 未算creamy, 如果濃d會更好。

大蝦沙律

跟餐既沙律我地揀左蝦沙律, 都係用油醋dressing, 菜葉亦都好新鮮, 蝦冇雪味。

煙三文魚他他伴木瓜牛油果

頭盤叫左Olive Cafe既招牌菜 "煙三文魚他他伴木瓜牛油果", 真係名不虛傳, 靚到一上枱已經吸引住我同大少既眼球! 由上至下依次數落黎既係: 原片煙三文魚, 三文魚他他, 牛油果, 木瓜, 伴碟既係藍莓醬。

炭燒鵝肝牛柳配法式薯批

餐主菜係炭燒鵝肝牛柳配法式薯批, 鵝肝外層煎得香脆, 入口即溶。牛柳我地要6成熟, 大少鍾意食生一d, 切開有少少血水, 食到中心位置都仲咬得開, 火候剛剛好。法式薯批既薯仔有炒過, 好味。

燒大蝦什菌炒天使麵

另外叫既燒大蝦什菌炒天使麵, 蝦有炭烤味, 肉質爽口唔霉。天使麵用橄欖油同蒜頭炒, 好香, 麵身亦好彈牙。