用餐環境算係呢度唯一可取之處，設室內室外用餐區，室內冷氣，裝修光猛有空間感，睇落乾淨企理，設計有花心思放泰國擺設裝飾，室外有冷風機，有Live Music。
（但正值新冠疫情，餐廳除左入門口有量體溫外，餐桌同餐桌間距離明顯完全不符合政府規定，亦不設阻隔。加上全餐廳滿座，著重防疫既食客要光顧可能要揀返閒日）
如標題，用餐體驗令呢間餐廳可一不可再。一坐低櫈都未坐暖，個睇落稍稍資深既四眼服務生就提醒用餐時間兩小時，掟低四份餐牌，唔夠兩分鐘就返轉頭起勢咁摧點餐。大佬，我一行7人兩分鐘餐牌都未有機會睇。
點餐後唔夠3分鐘，就有得食，第一輪嚟既係菠蘿炒飯同炒金邊粉... 一食落口心入面就講哂粗口，入口凍既.... 炒飯炒麵喎！好明顯係廚房炒定哂，有單就拎出嚟.... 食左兩啖就冇再掂過....
上左幾個開胃菜（蝦餅、生菜包等等）之後就上冬陰功湯，set好哂加熱，擺好哂碗等熱左自己分。咁好啦，見佢未係好熱就由佢慶住先，點知個四眼叔叔幾分鐘後行過嚟話，「熱就OK，慶太耐驚佢會煮到變太鹹」。心諗食完頭幾碟都凍，冬陰功慶多陣啦。點知就聽到四眼叔叔響離我唔夠兩個身位既距離同個後生啲既服務生講「你係要咁摧下佢哋，如果唔係唔知佢哋要擺幾耐先會郁。」大佬，你摧都算，仲要響正我隔離俾說話我聽？唔L係阿？其實到左呢個位，已經食咩都冇心情。
之後總共分兩round叫左10幾個餸，大部分都係上菜嚟到已經係冇溫度.... 中間漏咗一個第一輪落單點既馬拉盞炒通菜，後尾第二輪加單追兩次先嚟。
其實同朋友一行7人都知道2個鐘用餐時間，呢餐到最尾我哋90分鐘已經食飽。但四眼叔同其他兩個後生服務生都響用餐過程中不斷用「扮友善」既口吻滋擾我哋，不斷問駛唔駛收走我哋明顯未食完既餸菜。 90分鐘既時候已經過嚟問last order，要我地埋定單，搞定泊車拎車，嘗試迫你盡快交檯。我哋最後坐到7:59分準時交檯。
先莫講話食物質素一般，咁既用餐體驗，咁既服務，趕乞兒咁趕，唔駛錢我都唔會再嚟！
1
