譽粵菜 (已結業)

之前父親節，我係早兩日先醒覺要book枱食飯，度度都話full，搵左好耐先搵到，太太話開左咁耐都未試過，近外父外母，試試啦！呢度唔知食粵菜定上海菜呢？有上海野食，我地叫左小籠包同生煎包。小籠包有五隻，皮都幾厚，所以唔易穿，仲可以保持啲汁唔漏。一食落啲汁好濃，但濃得黎有啲咸，肉都幾結實。生煎包:36蚊3個，都幾貴。Size同普通酒樓叉燒包差唔多大，生煎都預左佢多油，但個包皮都幾好食，面頭脆脆地幾好味。西蘭花煎龍躉球油多係咪通病呢？炒個味係唔錯，但係真係太多油啦！西蘭花索晒d油，食完成口都係油，個味有幾好都扣晒分！金蒜粉絲蒸頭腩仍然地..油多，加埋蒸魚豉油，真係食左成擔油！龍躉肉肥肥地幾結實，骨唔多，都係啖啖肉！蒜蓉好香，吊起左個味，底既粉絲我就唔敢食，因為真係好多油..甜品我地叫左雷沙湯丸，係外父的最愛粉粉，煙煙韌韌的雷沙湯丸質感好好，一咬開，芝麻未去到流沙，但都有小龍包的感覺，啲芝麻係口中"郎下郎下"，個感覺超正！難怪外父大人咁中意