大和豚総本店 (已結業)

旺角區食肆一向都好多，但係自己從來都未試過係雅蘭中心食飯，今次朋友約我去大和豚食飯，本身我都係以一試無妨嘅心態去，但係原來質素又相當不俗！平日鍾意飲少少酒精飲品嘅我，就叫咗杯蘋果汁紅酒冰特飲。賣相已經夠靚，係玻璃杯入放滿左新鮮嘅蘋果果粒兼少量嘅伏特加酒，將蘋果汁加酒倒係紅酒冰球之中，係絕對有cocktail嘅感覺，爽呀！雜錦刺身用上肥美嘅三文魚、鯛魚、吞拿魚等等，厚切不在話下，最重要係每件刺身都食得出係非常新鮮，唔係係廚房放左好耐嘅下爛貨。每一件刺身放入口都感受到魚身嘅冰凍同彈牙口感，感覺相當之滿足。接著有大和青龍卷中，用牛油果包着三文魚飯卷，三文魚當然係肥美，而牛油果有著健康及清新嘅感覺，以青龍作做型，果然夠架勢！柚子椒鹽雞翼係我嘅至愛，雞翼上枱嘅賣相當之骨緻，一放入就即係食得出係用柚子汁醃過，所以食落去嘅時候都食到微微嘅柚子香，係送蘋果酒嘅最佳小食。豚肉野菜飛魚鍋，湯底用上飛魚乾，豬骨，骨膠原同醬油燉製，所以係非常之香濃。配上爽口嘅豚肉，入面卷著豐富而新鮮嘅蔬菜，食材嘅新鮮度爆燈！！豚肉同蔬菜將湯底嘅精華完全吸收，真係上佳嘅享受，難怪呢個火鍋，係餐廳嘅大熱之選！！