登堂 (已結業)

踏入聖誕月，唔少朋友都陸續約聚餐。放題有點heavy，單點又略嫌乏味，做吓research居然比我發現到呢間位於觀塘嘅「登堂」，決定試試佢。餐牌上最吸引莫過於有半自助餐，客人可揀選一個套餐，價格只需$298起，不論粉麵或肉類都可，就能享用埋salad bar，性價比超高。小編今次同友人分別選擇咗一麵一肉，兩樣都有驚喜。炭烤伊比利亞黑毛豬鞍炭烤味道十分濃郁，豬肉外脆帶點焦糖化非常出色，內嫩滑得來仲保留好多肉汁，食落肉質細膩，豬味濃郁，無得彈。配埋旁邊嘅黑椒汁同芥末醬，加入啲伴菜，一次過有多重享受。鮮海蝦煙腩肉貓意粉麵質有咬口，唔會太淋，醬汁雖唔算特別濃郁，但淡淡蕃茄香氣加啲忌廉感好夾。最精華一定係啲煙腩肉，有豐富油脂同鹹香，夾埋貓耳朵、爽彈大條鮮蝦、同入曬味嘅蕃茄一齊食，令到成碟麵風味大增。餐廳提供嘅Salad bar規模不小，當中包括冷熱鹹甜、中西日韓，菜式應有盡有。幾乎試勻後真係要重點推薦冷盤海鮮區同甜品部，前者新鮮有素質保證，後者選擇多元口味細膩，成件事可以媲美外間酒店水準。最後更要讚下呢到環境寬敞，座位舒適，又有格調，特別適合一班人，儘管口味各式千秋都能夠滿足到，絕對會再嚟。