食得喜小廚

营业中

休息中

今日好隨意地同屋企人去左食小菜，我記得幾年前電視小儀都有介紹過呢間野，佢由以前一間鋪，到擺埋出面，宜家連對面間鋪都變埋佢。我地去到夜晚8點幾差唔多坐爆晒，岩岩有檯卡位走左，咁我地4個就可以坐入去。餐廳好熱鬧，非常光猛又乾淨，難得食小炒環境咁好，最緊要冷氣夠晒凍！除左一般小炒之餘，仲有Ｄ炒粉麵飯，什至乎羊腩煲都有，幾多款式。最後我地叫左4款 Common野，有菜有肉，簡簡單單。西芹炒鮮魷呢個鮮魷賣相實在有點失色，一塊塊的，有功架既師父應該要界下花，令到魷魚卷起，咁先好睇。不過魷魚口感都唔錯，炒得岩岩好，硬度適中。唔知係咪好趕時間，西芹稍為生左少少，味道偏淡。蒜蓉炒白菜蒜蓉夠晒多，白菜好嫩，炒得好有鑊氣，令到Ｄ菜非常爽脆，都係略為淡。咕嚕肉本來想叫生炒骨，因為屋企人鐘意有骨落地，但Waiter話冇，唯有要咕嚕肉啦。個肉炸得好脆，粉唔多，全部都大大舊，好怕見到D咕嚕成粒豆咁細，一D口感都冇，D汁都落得岩岩好包住晒D肉，酸酸甜甜咁。不過青椒又係比較生，個掟都切得唔乾淨。啫啫雞煲上到檯即刻聽到唧唧聲，夠晒熱啲雞冇雪味，整得好滑，好夠味，豬潤都唔會過乾，幾juicy，蔥既量係夠既，不過爆得未夠香。