泰聚 (已搬遷) 新店位置

今日去咗太子搵朋友食午餐，上網睇吓太子有咩好嘢食，見到一間食泰國菜，於是我就決定咗食呢一間，去到發現餐廳嘅裝修比我想像中好好多，環境好大，樓底好高，坐得好舒適！而我同朋友就叫咗一個泰式喇沙海鮮湯麵，而今日嘅湯麵就係我最鍾意食嘅米線，yeah!另外仲叫咗一個波羅雞粒炒飯，感覺上分量好多，我哋飲品方面就叫咗個原個菠蘿沙冰同椰青，真係好泰式風情，哈哈！先講下個泰式喇沙海鮮湯麵，真係我食過咁多碗喇沙湯麵最好食，佢嘅海鮮材料非常豐富，而個湯底味道好濃郁，完全係唔會過淡，又唔會太鹹，剛剛好，米線都好入味，配上多種海鮮一齊食真係好滿足！至於個菠蘿雞粒炒飯都相當吾錯，分量果然好多，加上上面滿佈肉鬆同腰果，真係好惹味，層次更上一層樓！飲品方面，個原個菠蘿沙冰好𥄫睛，係天氣熱嘅時候飲一啖真係無敵正，超級透心涼！而椰青都係食泰國菜絕對吾少得，大大個，仲可以食埋佢裏面嘅椰子肉，聽聞可以養顏添！整體來講，呢間餐廳嘅午市真係好抵食，坐得又舒服，值得推介！