渝味曉宇重慶老火鍋 (QRE Plaza) (已結業)

近排經常留係屋企，又諗起好耐無去打邊爐，係openrice見到呢間餐廳評價唔錯，於是襯weekend就去試下佢個正宗麻辣火鍋。一入到去，侍應就係我地面前用熱水洗餐具，令人安心，亦都好體貼地提供圍裙俾我地著，然後就端上一碗清甜雪耳糖水，潤一潤喉。由於我地係食午市，有火鍋免收湯底錢的優惠，就揀左皮蛋香菜+普通辣大紅鴛鴦湯，麻辣鍋辣度適中，岩曬唔算好食得辣的我倆。主菜黎啦！肉類食物分別有一份安格斯優質肥牛、優質肥牛粒同埋紐西蘭羊肉卷。重點攞介安格斯肥牛牛味濃郁，肉質鬆軟，油脂平分佈平均，值得encore！羊肉卷一向係我最愛，浸落麻辣湯底食特別夾味，真係食到停唔到口。另外，我地亦都叫左一碟皇帝菜、粟米同黃金菇，食材新鮮，當中皇帝菜唔算好多地方有得食，所以黎到都可以試下。食到八分飽，就係時侯叫甜品過下口癮，叫左份紅糖糍粑，岩曬煙韌控的我。