尚鮮海鮮料理 (已結業)

三五知己烚下烚下，幾時都話打邊爐對食材要求最高，因為冇得用咩味道去遮掩食材唔新鮮，所以打邊爐一淥就知龍與鳳，知道食材新唔新鮮。銅鑼灣尚鮮店如其名，真係幾新鮮。可能新開關係，我哋八點零鐘walk in都有房坐。打邊爐最鍾意就係食海鮮，湯底就揀個龍皇海鮮鍋啦。裡面有大蜆、蝦、蟹、聖子等等，湯底偏橙色，好明顯就係蝦膏蟹膏煲到出晒味～襯未加湯之前飲咗兩碗，非常鮮甜。隻蜆都唔野少架，大大隻。等緊湯頭滾嘅時候，食啲小食先～百花釀油條：將手打蝦膠釀入油炸鬼，炸到熱辣辣，咬入去既有油炸鬼嘅鬆脆，又食到彈牙蝦膠。燒芝士竹輪就係類似吉X家果啲，不過燒到芝士融晒。生蝦！新鮮，爽口，個汁調到好辣呀終於野食到～牛三併顧名思義有三種牛，肥牛、手切牛肉、安格斯牛柳粒，最欣賞手切牛肉，薄度啱啱好，牛味濃。層層疊午餐肉個樣就過癮喇，食落都有唔少火腿係裡面，切成條狀好快有得食喇！其餘冇影到嘅稻庭烏冬、牛頸脊、脆鯇都值得一試。