蟹仙海鮮蒸氣鍋 (仁愛街) (已結業)

最近限聚令放寬咗，終於可以一家人出去食返餐好嘅。屋企人鍾意食海鮮，今次專登嚟到新蒲崗食返餐好嘢。呢間餐廳嘅員工除咗介紹各款海鮮外，仲會幫手計時同蒸食物，熱心又親切。全店嘅海鮮係由老闆直接同艇家攞貨，保證新鮮無激素，健康又好食。我哋揀咗專貴海鮮套餐，除咗有九款海鮮外，仲有蔬菜拼盤同粥底火鍋。先嚟嘅係貝類同海蝦，蒸嘅時間較短好快食得。虎蝦大大隻仲長過手指，肉質爽口彈牙。青口好肥美，咬落韌韌地有嚼口。珍珠蠔味道鹹鹹地有淡淡嘅海水味。刀背蚌蒸得好juicy。 月亮貝好大粒，口感鮮嫩。鮑魚口感厚實啖啖肉。跟住嘅蒸魚魚肉好嫩滑，淋上豉油更帶出魚嘅鮮味。然後就係兩種硬殼類海鮮。龍蝦肉好結實咬落好爽口，味道甘甜好好食！黃奄蟹一隻有手掌咁大，中間嘅膏好香濃惹味，蟹肉都幾多。今日嘅蔬菜拼盤有粟米、生菜同娃娃菜，食落仲有海鮮味好正。食埋個吸咗海鮮精華嘅粥，好味又滿足。最後仲送咗個越南椰汁雪燕燉官燕，飲落好清甜好好飲。